Dušši dušše duššat

áigi oaivvahuvvan oaivámušaid áigebombba burgit
jagiáiggiid gierdui ovtta guvlui ovdáneames murdit
doalahuvvon doaladumiid vuoitit vuođus
luoitit vuoitimis luovus, riegádit ođđasit eallima goađus
vaikko vigget vuoluštit viidodaga, visot áigot áidut
mis gitta váidugo boatkanmeahttun viisodaga ráidu
lávket ovttas oktan oktavuođa etnui ovttastuvvat
jávket mearkkašmeahttun mihttomearit go lihkostuvvama mokta šuvva
skáhppomii snahppon diŋggaid dáhppo, fáŋgalnjálmmi duohkai dahppo
dássedeattu uksa láhppon sieluide rahppo
laigada menddo váigat, moivvi morrašiin váibada
ráiganan sielut gáidan biejus, áibbašeamen spáidara
váidalit oktonas váimmut, váillahit dáidaga
áigahaš dieđu ráidalasat mieđuštit, áidalas staigada
eamiálbmogiin fearán mii earáide muitalanveará
dán beal duoddara veattástuvvan mielaide don beallai dievá
máilmmi giela ii sáhte rievdadit, muhto oahppat áddet
dajahusat jáddet, ráddet, buollájit ja fas roahkkadit láddet
eallimiige vealtameahttun ohcat ja viggat bisánmeahttumit
soaittahagaid nohkameahttun feaillat viisá čeahppudit

muossi máilmmi guossit
eallenoassin eallit ollis oassin
goaffariid oaffaruššat
go lea dušši dušše duššat
ferte lahppot ahte livččii
manahit vai árvvoštivččii
áddet ahte beroštivččii
lea dušši dušše duššat

Loktanit lagaš lávus suovat, rávket buorre eahkeda
ráiggis reahpena, geahpedit fuolaid
oanehis geassi geasuhii giellavealggu girdilit gierragis
čuojahallat čoddagis gietkamii gierisin šiellan bearrašii
márahagain mášolažžan šaddan máddarat
časkkáhallan čoaska fáskasiin, duoddarat min fáddarat
gollegiella čáppa čavčča čađa dálvái dávista
giđa beaivvážis bivalda bievlan, eallima lievla šáviha
ráfi rájus váimmus, gierdavaš gierddu reaŋgan njuorai
guorba guovlluin gulul guoradit guoikka guora
šiegain šiehttá duottarvielttis duhkoraddat suonjar
sámit šaddan šaldin čuojahit luonddu šuohkki šuoŋa
bivvá bistevašvuohta eallinvuogis, duojis, gárvvuin
árbbolaččaide arvu atnit attáldagaimet árvvus
atnit ávvira johtolagas goavvejagiid badjel čuovvovaš badjái
johtit orohagaid gaskka vai ođđa geargá šaddat sadjái
dássedeattu vuoibmi vuoigŋá min čađa, dan dovdá gamus
siskkáldas soabadis álbmon sámi álbmot issoras fámu
čagadit vaikko riššá ruššuid ráššu ja bossu boaššui vaššu
čuotnamiin bissu viššu, ain cagahuvvo mášu áššu

oatnelanbotta eallima oalli min sallu
oidnosat oainnádahkan váreoaivvis fállun
geahčastin vulos, goddalin moji
beazit beaivvadagas, biegga sojahalai sogiid
ádjagis jogaš, jogažis eatnu
rávdnjin rávdnjot riegádan čiekŋut
šelgot čázit, čađa čuvget, šerres sieluin
jiella skeŋken šiela, eallju eallit ealuin
dulbmet skuovat juovaid, guldalit duođaid
biegga njávká muođuid, beaivesuonjar čalbmeluovain
skierrit sojadit, oavssit hieimmas
biekka sánehis sáhka guossi deaivvai
ráhpásmuvvan juovahagas áhpásmuvvá
sánehis ráfi ráhkisvuhtii oahpásmuvvat
áddejedje áhkut, áddejedje ádját
hupmá eana, ii dán čábbodagas rádjá