A giuvanotta è u rè

Era una bella zitella
Un fiore di giuventù
Lucia quant'una stella
È forse ancu di più

A so vita era un fiume
D'asgiu di risa è di ghjocu
Ma sottu à tantu dulciume
U so core era di focu

Brusgiata da l'ore
I falzi piacè
Era pronta à more
Per l'ochji d'un rè
Ellu ùn i vidia
L'ochji di a zitella
Lascendu à umbria
'Ss'alma cusi bella

Era colma à tennerezza
Quant'ellu pò esse un fiore
Ella era tutta carezza
Ellu ùn era chè furore

Eiu à son'di ghitara
Aghju dettu à 'ssa zitella
Quantu a tinia cara
Quantu a vidia bella

È un bellu ghjornu
Chjappai a so manu
E senza ritornu
A purtai luntanu
U fior'di vaghjime
Ch'ùn volse u rè
A rombu di rime
U colsi per mè

U fior'di vaghjime
Ch'ùn volse u rè
A rombu di rime
U colsi per mè