Western

Ig u du
mir hei ds glyche tattoo
eine isch zviel i däm schpiel
ig oder du
wed schnäller bisch nimm d liebi
dr ruhm u ds ganze gold
aber wenn mi dr bode sött frässe
söll niemer frage was i wott
i wott ke schtei ufem hoger
nume es chrüz us holz
dr sand rünnt mir dür d finger
gschpürsch dr huuch vom tod
django...

mir sy viel z' lang zäme gritte
dür jede chuepflütter
düre schnee u düre schtoub
itz steisch mir i dr sunne
dr weschte isch wild u dr oschte isch rot
i ha gäng gwüsst du ziesch schnäller
aber i ziele genauer
zwöi schiessyse bysse löcher
ids erschte morgegraue

itz flüge d geier uuf
u du bisch uf dym letschte ritt
sorry dyni zyt isch ume
u der wind singt s lied vor prärie
du bisch gäng e cowboy gsii...

dr western isch verbii
es het grägnet
d liebi wo ni der colt müesst für se zieh
isch mir zum glück no nid begägnet
dr mustang isch nume es velo
dr colt isch e banane
dr bahnhofsplatz isch nid d wüeschti vo sonora
u d aare isch nid dr rio grande
morn muess ig is schlachthuus go schaffe
si spile wiener bluet
es isch ja nume e film gsii u dr wind singt s lied
vom tod
i bi gäng e cowboy gsii
u bi gäng e cowboy bliebe
ha mys läbe lang
nume rindviecher vor mi häretribe...