Lismete

We si flüchtet in gedanke
när geit sie mitem bäse
sie lismet sich es mannli
wo mir gliicht
flügt unsichtbar ums tannli
u scho isch si furt

sie flügt zum häxetanz id bärge
dert küsst sie siebe zwärge
i ihrne wulleschtrümpf
die hei rümpf u löcher
schwäbt über gärte über dächer
bringt siebe zipfumütze hei

ynestäche umeschlah
dürezieh u abelah
zwöi linggs zwöi rächts
was dänksch itz
du seisch so nüt
säg liebsch mi no
sie lacht es bitzli scho
u lismet mir zwöi hasenohre a

we si lismet cha si häxe
mit ihrne spitze stachle
flügt über ds ganze ättiland
mit syne chräche bis zum napf
weme nid wett so wie me sött
när gits e chlapf

mit bösem blick strickt si am stille glück
u lachet
wär cha scho wüsse was sie dänke
we si eim wullesocke schänke
i dene chalte stille nächt

när flügt d lismete dür d luft
u när gits eis mit em bäse
nume nid störe we si lisme
süsch gits ke zoubertrank
kes gar nüt
nid emal guet nacht