Matrimonio d'o Guarracino

Lo guarracino che gghieva p' 'o mare
Jeva truvanno de se 'nzorare
E se facette nu bello vestito
De squame de pesce pulito pulito
Visitanno fosse e pertose
Se 'ncuntraje cu 'na vavosa
Llà pe' llà le facette 'a 'mmasciata
E 'o matremmonio fuje cumbinato

P' 'o spusarizio ce fuje mmitato
'O scuorfano, 'o cefaro e 'o pesce spata
Alice e sarde a meliune
Anguille, murene e capitune
Merluzze, spinule e purpetielle
Treglie, mazzune e cecenielle
Aurate, dientece e calamare
E 'o delfino facette 'o cumpare

'Nu pesce bannera tutto aparato
L'ha beneritto cu l'acqua salata
E 'o guarracino dicette allero:
"E finalmente me sì mugliera"
"Ebbiva 'e spuse", abbajaje 'o pescecane
E tutte 'e pisce sbattettero 'e mmane
Tra vase e squase abbracciamento
Accuminciaje 'o festiggiamento

Ascette mmiezo la quaquiglia
Ca cumannaie 'na bella quatriglia
Doppo venettero li seccetelle
Cu tammorre e castagnelle
E accussì nzieme alli spuse nuvelle
S'abballaje la tarantella
Accumpagnata da 'o pesce salmone
Ca sunava lu calascione

Ma 'a sardella se sente int' 'a panza
Comme si fosse 'na cuntraddanza
"Aiuto! Aiuto!", alluccaje n'alice
"Priesto chiammate 'na levatrice!"
"È cosa'e niente," dicette 'a murena
"Chella 'a sposa già era prena"
"A chi è figlio?", strillaje 'o guarracino
"M'haje fatto curnuto 'e santu Martino!"

"'O ssaccio", alluccaje 'o sparaglione
"Stu 'mbruoglio l'ha fatto cu 'o capitone"
Allucche, strille, 'nu parapiglia
Fra pisce estranei e la famiglia
Venettero mmiezo amice e pariente
E subbeto ascettero a pisce fetiente
A tutto chesto li pisce mmitate
S'appicicavano ll'uno cu ll'ate

Chianette, ponie e secuzzune
Pacchere, cavece e scerevecchiune
E succedette proprio 'na uerra
'Nu fuja fuja e 'nu serra serra
Cinquanta muorte, duiciento ferite
E n'ati vvinte 'mpericulo 'e vita
E ll'ate jettero add'o speziale
Pe piglià ll'acqua turriacale

E la sposa pe' la paura
Se sgravaje de la criatura
Ma fuje 'na granda maraviglia
Pecchè facette 'nu scunciglio
E accussì se fernette 'o festino
D' 'o spusalizio d' 'o guarracino
E accussì se facette 'o festino
D'o spusalizio d'o guarracino