Shahsware Karbala

Rasme Ushshaq yahi hai ke wafa karte hein
Yaani har haal mein haq apna ada karte hein
Hosla Hazrate Shabbir ka Allah Allah
Sar juda hota hai aur shukre Khuda karte hein

Shah Saware Karbala ki Shah Sawari ko Salam
Neze pe Qur'an padne wale Qari ko Salam
Raat Din bichhde huon ki raah mein rehna khade
Hazrate Sughra Tumhari intezari ko Salam

Sar se Chadar chhin gayi lekin nazar uththi nahin
Hazrate Zainab tumhari Parda-dari ko Salam
Muskurate tegh pe roshan kiya rangin charagh
Akbaro Qasim tumhari jaan-nisari ko Salam

Kat gaya kunba musibat sar pe aayi lut gayi
Ho gayi Bhai Bhatijon se judai lut gayi
Umar bhar ki dashte gurbat mein kamai lut gayi
Roke jab kehti thi Zainab haaye bhai lut gayi
Ghar Ali ka kya luta sari khudai lut gayi

Har Imtihan mein Saabiro Shakir rahe Hussain
Kohe Alam uthane ko hazir rahe Hussain

Dhoke se kufiyon ne bula kar sitam kiya
Mehman be-watan ko bula kar sitam kiya
Khema lagana naher pe Ahmad ki aal ka
Pani bhi band kar diya Zahra ke laal ka
Lashon ko bhanjon ki lahu mein sajake laaye
Tute hue bahisht ke taare uthake laaye
Aaya kisi ko paas na roohe Rasool ka
Gul kar diya charagh Mazaare Batool ka

Aayate zuljalal ke manzar garift mein
Arshe ula zameen ka langar garift mein
Har maktabe khyal ka mehwar garift mein
Neze pe sar hai or hai mehshar garift mein

Dastaar hai Hussain ke sar pr Rasool ki
Ki maut bhi kabool to esi kabool ki
Chahere pe jiske Maula Ali ka jalal hai
Kabze mein jiske Bhai Hasan ka kamal hai
Mein kya kahun hain kaun meri kya majal hai
Sab jaante hein Fatima Zahra ka laal hai

Chehra Rasool ka labo lehja Rasool ka
Aankhon mein khinch raha hai sarapa Rasool ka

Shah Saware Karbala ki Shah Sawari ko Salam
Neze pe Qur'an padne wale Qari ko Salam