Albert Einstein mihia

Logelako posterretik
mihia ateratzen duen
Albert Einstein mutu horrek
zer esan nahi ote du?

Begi urdin, ile luze,
ez da orraztu sekula.
Mihi horrek orain nori
egiten dio burla?

Hogeigarren mendeari?
Mundu nahasi honi?
Kalean dabilenari?
Eta zergatik neuri?

Estatu eta banatu guztiei
ala geu gizajooi
ateratzen diguzu
mihi hori?

Mihiaren kontzeptu hori
askoz da larriago
erlatibitatearen
teoria bera baino.

Kabulgo azokan
munizioa eta amapola,
gelako orman
Albert Einsteinen mihia.