Gumising

Ang awit na ito'y isang bato-bato sa langit
Ang sino mang tamaan ay huwag sanang magagalit
Bago dumaing at maghanap ng sisisihin
Dapat munang ikaw ay gumising

Gising ka na ba no'ng bago naging isang magulang?
Ang dami ng anak mo ba'y iyong pinagplanuhan?
Naibilang mo ba sila sa iyong kayang buhayin
At kaya ng bulsang pag-aralin?

Gising ka na ba no'ng halos wala kayong makain
At 'di mo mapigilang sa asawa ay sumiping?
Kung apelyido lang ang hangad mong paramihin
Dapat lang na ikaw ay gisingin

Gumising at magtrabaho na
Gumising at magtiyaga ka na
Gumising at magtipid ka na
Gumising at mag-ipon ka na

Katabi ay dapat isama mo
Katabi ay dapat hatakin mo
Katabi ay dapat turuan mo
Tapikin ang isip, gisingin mo

Gising ka na ba no'ng kamuntik nang masagasaan
Ang iyong mga anak na laging nasasa lansangan?
Kung hindi nababantayan at walang susupil
Sino sa iyong tingin ang inutil?

Gising ka na ba no'ng mga nakaraang halalan
At naniwala kang mahahango sa kahirapan?
Kung pangako lamang ang iyong inaasahan
Gising na't nasa 'yo ang katuparan

Gumising at magtrabaho na
Gumising at magtiyaga ka na
Gumising at magtipid ka na
Gumising at mag-ipon ka na

Katabi ay dapat isama mo
Katabi ay dapat hatakin mo
Katabi ay dapat turuan mo
Tapikin ang isip, gisingin mo

Awit na ito'y isang bato-bato sa langit
Ang sino mang tamaan ay huwag sanang magagalit
Bago dumaing at maghanap ng sisisihin
Dapat munang kayo ay gumising