Sceccu mi chiamu

Quannu u' Signuri lu munnu criò,
Ad ogni armali lu nnomu assignò.
Spiò lu sceccu: "Comu mi chiamu?
Nu bbellu nnomu, Signuri, spiramu."
"Sì, certamenti, ma 'un mèntiri bbeccu,
È un bellu nnomu, tu ti chiami sceccu."
Tuttu cuntentu lu sceccu si nn'jiu
E di la vista prestu spiriu
Ma, strata strata, lu nnomu scurdò
E unn'u' Signuri cu prescia turnò.
"Oh signuruzzu, nun sacciu chi fu,
Ma lu me nnomu nta testa nun c'è chiù."
"Eh, sceccu ti chiami", dissi u Signuri,"
"tènilu a menti fammi u favuri."
Je n'autra vota lu sceccu si nn'jiu
E di la vista prestu spirìu,
E ppi nun scurdari lu nnomu ch'havìa,
Ad ogni passu lu ripitìa.
E lu ragghiava ammenzu a la via
Cu tutta la vuci la vuci c'havia.
"Sceccu mi chiamu, nun sugnu mulu,
Cu nnomu sceccu ci sugnu ju sulu."
Sta litania a longu durò
Ppi 'nfinu a quannu lu sceccu ammagghiò.
Ma di la so testa che è veru gluriusa,
Lu nnomu scappa e resta cunfusa.
Arreri torna poi nni lu Signuri
E ci dumanna lu stissu favuri.
E lu Signuri cu santa pacenza:
"Sceccu ti chiami, no arca di scienza."
"E sceccu mi chiamu e cchiù nun lu scordu,
Ca sugnu sceccu mi l'ariordu."
Ma si ripeti la stissa fattetta,
Je lu signuri o passu l'aspetta,
Perdi li staffi, l'aricchi cci afferra,
Je cci li tira ca pari na guerra.
"Sceccu sciccuni, lu voi capiri, ah!
A si propriu sceccu, comu ti l'haiu addiri?"
Cu lu tirari l'aricchi allungaru
E longhi longhi cci addivintaru.
Eccu spiegatu, perciò, lu misteru
Pirchì lu sceccu è sceccu davveru.
E lu primu sceccu nun lu capìu
Ca cu la murali la storia finiu,
E si lu cerchi ammenzu a la via,
Lu trovi ca ancora, ancora ragghìa.