Ya denia

كمال مسعودي . الدّنيا
"""""
يا حسراه عليك يا دنيا، فيك حكاية و حكيات
ساميني و اقّعدي حدايا و إحكيهم لي بثبات
علاش هكذا حاقدة و سمّية، تظلّي تبدّلي فالصّفات
تعذّبي فيّا غير بشويّة عييت من عذابك بركات
"""""
تلعبي بيّا ولّا معايا جاوبيني علاش هاذ السّكات
قالولي عليك مسرحية، أنا المسرح سكن لي فالذّات
التّذكيرة خلّصتها غالية ادّيت معايا شي وردات
دخلت للقاعة صفقوا عليّا طلع السّتار و الضوء طفات
لقيت روحي في تمثيلية و الدّيكور خوف و دمومات
طمّعتيني و درتي عليا عندي جدي بصّح مات

يا حسراه عليك يا دنيا، فيك حكاية و حكيات
ساميني و اقّعدي حدايا و إحكيهم لي بثبات
علاش هكذا حاقدة و سمّية، تظلّي تبدّلي فالصّفات
تعذّبي فيّا غير بشويّة عييت من عذابك بركات
"""""
شحال من سلطان كان في دنيا، جيوش لأمرُه طايعات
مال و عزّ قصور و سرايا، العسّة عليه بالألوفات
غفل غفلة تقلبت الحيّة فليلتُه ما صاب وين يبات
وكّلتي فلان عسل و فاكية و فلان شمّختي لُه الفتات
فلان ڤلعتي لُه الذرّية، و حياتُه من الفرح خوات
فلان طلّق مرتُه المسكيّة زعف كي جابت لُه البنات

يا حسراه عليك يا دنيا، فيك حكاية و حكيات
ساميني و اقّعدي حدايا و إحكيهم لي بثبات
علاش هكذا حاقدة و سمّية، تظلّي تبدّلي فالصّفات
تعذّبي فيّا غير بشويّة عييت من عذابك بركات
"""""
المسجون يرجى الحريّة بالدّقيقة يحسب الاوقات
و الشّهار يحلم بالشّهرية يا حليلُه مولى وليدات
كبدة لمّيمة مشويّة، واش سهرت و واش ربّات
على وليدها بدّل جنسية عجبُه زين الرّوميات
خلّى يمّاه وحدانية، من الحرقة و البكى اتّعمات
باش يبيّن الرّجوليّة بعث لها زوج محّرمات

يا حسراه عليك يا دنيا، فيك حكاية و حكيات
ساميني و اقّعدي حدايا و إحكيهم لي بثبات
علاش هكذا حاقدة و سمّية، تظلّي تبدّلي فالصّفات
تعذّبي فيّا غير بشويّة عييت من عذابك بركات
"""""
نهار كانت الدُنيا دنيا الوالدين علقولهم شيعات
اليوم الوالدين راهي مرميّة في مراكز الشيخوخات
أنتِ دنيا يدّك زهريّة، أنا يدّي فيها الكيّات
مع الواقف درتي جمعيّة سمّاها دخلات و خرجَات
الڤلّيل بعثتي لُه خطيّة، جا يصلّي تلفت لُه الصّلاة
كي سلّم نسى التحيّة، كي تحّى نسى زوج ركعات

يا حسراه عليك يا دنيا، فيك حكاية و حكيات
ساميني و اقّعدي حدايا و إحكيهم لي بثبات
علاش هكذا حاقدة و سمّية، تظلّي تبدّلي فالصّفات
تعذّبي فيّا غير بشويّة عييت من عذابك بركات
"""""
المال فاني و العضام راشية، فاتت جناس و اتّمحات
اللّي كان تقيّ و دار النيّة، طاع ربّي و شد فالصّلاة
درجتُه فالجنّة عالية صفة الجنّة درجات
و الشّاقي يمضي النّهاية ذاتُه بالنّار اتّكسات
جلدة رايحة و جلدة جايّة، يظل يبدّل فالجلدات
نصيحتي نتركها التّالية باش نختم بيها الابيات

يا حسراه عليك يا دنيا، فيك حكاية و حكيات
ساميني و اقّعدي حدايا و إحكيهم لي بثبات
علاش هكذا حاقدة و سمّية، تظلّي تبدّلي فالصّفات
تعذّبي فيّا غير بشويّة عييت من عذابك بركات
"""""
دعوة الوالدين رسميّة، منهم الشرّ و الخيرات
الهناء كنز و الصّحة غالية و الباقي كلّه كذوبات
ياسين ارسلها تحيّة و مضى فيها بشي دمعات
بعثها كمال مسعودي بريّة ڤيثارة و طار و آلات
الصّلاة على نور عينيّا، سيّد الخلق يا سادات
شكون نجى منّك يا دنيا، غير اللّي طلّقك بالثلاث

يا حسراه عليك يا دنيا، فيك حكاية و حكيات
ساميني و اقّعدي حدايا و إحكيهم لي بثبات
علاش هكذا حاقدة و سمّية، تظلّي تبدّلي فالصّفات
تعذّبي فيّا غير بشويّة عييت من عذابك بركات