El Qalb Yaashq

القلب يعشق كل جميل وياما شفت جمال يا عين
واللي صدق فى الحب قليل وان دام يدوم يوم ولا يومين
واللي هويته اليوم دايم وصاله دوم
لا يعاتب اللى يتوب ولا فى طبعه اللوم
واحد مافيش غيره ملا الوجود نوره
دعاني لبيته لحد باب بيته واما تجلى لي بالدمع ناجيته
كنت ابتعد عنه وكان يناديني
ويقول مصيرك يوم تخضع لي وتجيني
طاوعني يا عبدي طاوعني انا وحدي
انا اللى اعطيتك من غير ما تتكلم
وانا اللى علمتك من غير ماتتعلم
واللي هديته اليك لو تحسبه بايديك
تشوف جمايلي عليك من كل شيء اعظم
سلم لنا تسلم
مكة وفيها جبال النور طلة على البيت المعمور
دخلنا باب السلام غمر قلوبنا السلام بعفو رب غفور
فوقنا حمام الحما عدد نجوم السما
طاير علينا يطوف الوف تتابع الوف
طاير يهني ضيوف بالعفو والمرحمه
واللي نظم سيره واحد ما فيش غيره
دعاني لبيته لحد باب بيته واما تجلى لي بالدمع ناجيته
جينا على روضه هلا من الجنة
فيها الاحبه تنول كل اللى تتمنى
فيها طرب وسرور وفيها نور على نور
وكاس محبه يدور واللي شرب غنى
وملائكة الرحمان كانت لنا ندمان
بالصفح والغفران جاية تبشرنا
يا ريت حبايبنا ينولوا ما نلنا
يا رب توعدهم يا رب و اقبلنا
دعاني لبيته لحد باب بيته واما تجلى لي بالدمع ناجيته