O guappo 'nnammurato

Mm'hê 'ncarugnuto cu chist'uocchie belle
Mm'hê fatto addeventà 'nu vile 'e core
'N'ommo 'e lignammo. Nun so' cchiù Tatore
'O mastuggiorgio 'e vasci'â Sanità
Nun so' cchiù io, mannaggi' 'a libbertà

Scorz' 'e fenucchio
Tengo 'nu bruttu pólice 'int'â recchia
So' bevitore 'e vino e, si mm'arracchio
Te scàrreco 'a ricanna 'int'ô renucchio
Scorza 'e fenucchio

Mme tratte comme fosse 'n'ommo 'e paglia
Prumiette sempe e nun mantiene maje
Ma nun capisce che, accussì, mme 'nguaje?
Nun saje ca, pe rispetto a ll'omertà
'Sta faccia accussì bella 'aggi' 'a sfriggià?

Surzo 'e sciarappo
Si arrivo a te piazzà 'stu miezu scippo
P' 'o mmerecà, nc'hê 'a mettere pe coppa
'Nu palmo e 'nu ziracchio 'e sparatrappo
Surz' 'e sciarappo

Femmene belle sempe na duzzina
N'aggio tenute appése a 'stu cazone
E mo mme sto' strujenno 'e passione
Pe te ca nun canusce carità
Chi sa 'sta pelle addó 'a vaco a pusà

Fronna 'e carota
Manco 'a quattuordece anne 'a carcerato
Però, chi mme ce manna 'n'ata vota
Se fa 'nteresse sempe 'nu tavuto
Fronna 'e carota

Te sî pentuta? E basta nun fa niente
Chello ch'è stato è stato e vienetenne
C'è poco 'a dì, chi nénna se pretenne
vicino a te nun have a che ce fà
È 'o stesso affetto ca mme fa spustà

Tu 'o ssaje ca i' feto
Si nun te 'nfilo 'o junco 'n'ata vota
Cu 'o curtelluccio mio a máneca 'e cato
Te scóso 'a 'nanze, 'a dinto, 'a fora e 'a reto
Tu 'o ssaje ca i' feto