Dhanya Mee Shabari Shrirama

धन्य मी शबरी श्रीरामा!
लागलीं श्रीचरणें आश्रमा
लागलीं श्रीचरणें आश्रमा
लागलीं श्रीचरणें आश्रमा

किती पावले मुनी मुक्तता
वृक्षतळिं या थांबा क्षणभर, करा खुळीला क्षमा
लागलीं श्रीचरणें आश्रमा
लागलीं श्रीचरणें आश्रमा

या चरणांच्या पूजेकरितां
नयनिं प्रगटल्या माझ्या सरिता
पदप्रक्षालन करा, विस्मरा प्रवासांतल्या श्रमां
लागलीं श्रीचरणें आश्रमा
लागलीं श्रीचरणें आश्रमा

गुरुसेवेंतच झिजलें जीवन
विलेपनार्थे त्याचे चंदन
रोमांचांचीं फुलें लहडलीं, वठल्या देहद्रुमा
रोमांचांचीं फुलें लहडलीं, वठल्या देहद्रुमा
लागलीं श्रीचरणें आश्रमा
लागलीं श्रीचरणें आश्रमा

निजज्ञानाचे दीप चेतवुन
करितें अर्चन, आत्मनिवेदन
अनंत माझ्या समोर आलें, लेवुनिया नीलिमा
अनंत माझ्या समोर आलें, लेवुनिया नीलिमा
लागलीं श्रीचरणें आश्रमा
लागलीं श्रीचरणें आश्रमा

नैवेद्या पण काय देउं मी?
प्रसाद म्हणुनी काय घेउं मी?
आज चकोरा-घरीं पातली, भुकेजली पौर्णिमा
आज चकोरा-घरीं पातली, भुकेजली पौर्णिमा
लागलीं श्रीचरणें आश्रमा
लागलीं श्रीचरणें आश्रमा

सेवा देवा, कंदमुळें हीं
पक्व मधुरशीं बदरिफळें हीं
वनवेलींनीं काय वाहणें, याविन कल्पद्रुमा?
वनवेलींनीं काय वाहणें, याविन कल्पद्रुमा?
लागलीं श्रीचरणें आश्रमा
लागलीं श्रीचरणें आश्रमा

क्षतें खगांचीं नव्हेत देवा
मीच चाखिला स्वयें गोडवा
गोड तेवढीं पुढें ठेविलीं, फसवा नच रक्तिमा
लागलीं श्रीचरणें आश्रमा
लागलीं श्रीचरणें आश्रमा

कां सौमित्री, शंकित दृष्टी?
अभिमंत्रित तीं, नव्हेत उष्टीं
या वदनीं तर नित्य नांदतो, वेदांचा मधुरिमा
या वदनीं तर नित्य नांदतो, वेदांचा मधुरिमा
लागलीं श्रीचरणें आश्रमा
लागलीं श्रीचरणें आश्रमा
धन्य मी शबरी श्रीरामा!
लागलीं श्रीचरणें आश्रमा
लागलीं श्रीचरणें आश्रमा